البنت جميلة وأكيد اخدت عين..!!
ولماذا انقلبت السيارة بالأشقاء الثلاثة في ترعة بالاسماعيلية ؟
اوعى حد يقول لأن تريلا زنقت عليهم سواقها كان محشش ..الحسد ومفيش غيره!!
٣ اخوات أطباء اخدوا عين ..واللي يقول غير كده يبقى كافر..
دا الحسد مذكور في القرآن..
وجاهل اللي ميعرفش ان العين فلقت الحجر !!
ولماذا قتل سائق التوكتوك السوهاجي ابنة أخيه الطفلة المعاقة شيماء؟
لازم يقتلها.. الشيخ المبجل طلب منه كده: الجن مش هيقول لهم على مكان كنز الآثار في المقابر
الا اذا قدموا له جثة شيماء قربانا..!
ولماذا قتل محمد أمه في قرية الطويلة بالبحيرة وفصل رأسها ؟
لأنها عاوزة توزع الميراث بينه وبين اخواته البنات..ازاي البنت تاخد ملكهم وتعطيه لزوجها..لراجل غريب !!!
وليه طالب الثانوية محمد بيغش في الامتحان؟
طيب هيعمل ايه؟!..نفسه يدخل كلية "القمة"
وبعدين محمد دا طالب متدين!!
قبل ما بيجاوب على الأسئلة بيبسمل!!
وطول عمره من ساعة ما وعي وزي ماابوه علمه بيصلي الفجر في الجامع جماعة وحافظ القرآن..
وطول الليل ذكر وتهجد وقيام..وان شاء الله لما يحصل على مجموع يدخله الطب ابوه هياخده ويروحوا يقضوا العمرة ويسجدوا في الحرم حامدين شاكرين لله نعمته..!!
وهيرجعوا ببرميل من مية زمزم المباركة يوزعوه على الحبايب.. وطبعا مش هينسوا المدرسين اللي كانوا بيزغطوه المناهج في غرز الدروس الخصوصية وبالذات المدرس اللي كان بيغششه بالموبايل!!!
طيب وفين المسئولين عن الإعلام والصحافة؟
الله يكون في عونهم..مابيناموش..كل واحد سلندراته الأربعة شغالة ليل ونهار..
ازاي يحافظ على الكرسي اللي اقتنصه..أو يقتنص كرسي أعلى..ازاي يلاقي طاقة قدرتنهمر عليه بكام ميت الف ..وجايزبكام مليون. ازاي يبقى نقيب صحفيين..
"والله من دلوقتي بعضهم بيربط رغم أن لسه ٩ شهور عن الانتخابات "..!! ٣ سلندرات بيوظفوهم في الحاجات دي والسلندرالباقي للتطبيل..!!
طيب والمثقفين فين؟؟
ضمير الأمة ورأس حكمتها؟!! ضمير ايه وحكمة ايه؟!..برضه يستحقوا الشفقة ..اللي عيان ومفيش فلوس يتعالج..
واللي بيلهث وراء جايزة علشان بفلوسها يجوز بنته..!
وكتير ..فاهمين أنه مايليقش بهم أن يتكلموا عن نيرة المذبوحة أو شيماء المغتالة أو الخفير غالب اللي اتجوز ٩ وخلف ١٧ .. ايه اللي بنزلهم للمستوى ده..!!مكانهم فوق المنصات.. ينظروا عن رولان بارت...عن البنيوية والتفكيكية ..حتى لو كانت المنصات دي في قاعات فاضية مفيهاش صريخ ابن يومين. ..مفيهاش غير الساعي الغلبان اللي بيقدم لهم القهوة وطبعا مش فاهم من كلامهم حاجة..!!!!!
...........
ياترى احنا رايحين على فين؟؟؟ !!!
