تصدر اسم الفنانة عزة سعيد تريند محركات البحث خلال الساعات القليلة الماضية، بعد ظهورها المفاجئ بعد فترة غياب طويلة في حلقة مع الفنان إدوارد، لتظهر خلال اللقاء بحالة نفسية غير مستقرة، ما دفع الجمهور إلى الهجوم على الأخير واتهامه بالسعي خلف التريند.
وبسبب الهجوم عليه قدم إدوارد اعتذار للجمهور عن الحلقة موضحا أن هدفه كان دعمها للظهور إلى الأضواء مجددا، مؤكدا على حذف الحلقة احتراما لرغبة الجمهور.
وكتب عبر صفحته الشخصية على فيسبوك قائلا: « لما فريق الإعداد بلغني بوجود الفنانة عزة سعيد فرحت جدا إني هستضيف فنانة وزميلة وموهوبة غايبة بقالها فترة عن الوسط الفني زي ما دايما بعمل في برنامج "القاهرة اليوم" وبستضيف كبار النجوم اللي أسعدونا وبكرمهم».
وأضاف إدوارد : «وإحنا طبعا برنامج هوا ولما لقيت الضيفة عندها مشكلة احترمت ده وقفلت الفقرة قبل ميعادها احتراما ليها من غير ما ابين إني استغربت الكلام وهنحذف الفيديو من على صفحة القناة لأننا بنحترم كل الناس» واختتم رسالته قائلا: «وأنا بعتذر لو حد زعل مني أكيد مكنتش أقصد حاجة وحشة ونيتي صافية زي ما كل الناس تعرف عني إني دايما بحب وبدعم كل فنان».
وأمام هجوم الجمهور الشرس دافع عدد من المتابعين والنجوم عن إدوارد وخاصة بعد تقديمه اعتذار عن الحلقة من أبرزهم الفنانة فريدة سيف النصر التي حرصت على دعمه مشيرة إلى أن الأخير كان له دور كبير في ظهور نجوم خفتت عنهم الأضواء وكتبت عبر صفحتها الشخصية على فيسبوك :«أنا مشغولة في اخويا جدا ادعوا له.. بس مش معني كده اسيب اخويا الصغير إدوارد فؤاد الفنان جدا الراقي المحترم الإنسان لشوية لجان تكره الناجح».
وأضافت: « أنا شوفت الحلقة ولا فيها كل ما يدعو للي بيتقال ده كله.. اهدوا شويه ياحبايبي بالراحة علي نفسكم الكراهيه والحقد والسموم اللي بتتبخ دي بترجع على أصحابها صدقوني خايفه عليكم النار دائما بتاكل نفسها» وتابعت: «إدوارد تكرم وحط الضوء على ناس ماحدش فكر فيها اصلا.. إدوارد أحيانا كتير بيدفع من جيبه وأنا عرفت وأتاكدت».
واستكملت حديثها موجهة رسالة خاصة إلى إدوارد قائلة: «كفايانا حرب في بعض.. الناجح نفضل وراه لما يقعد بتستفيدوا ايه.. اسمع يا إدوارد خليك محارب شجاع زيي وأرمي ورا ضهرك وماتلتفتش واعتبر غلطهم في ميزان حسناتك وخليك عارف لا تضرب بالحجارة إلا الشجره المثمرة».
واختتمت فريدة سيف النصر حديثها قائلة: «ماتبصش وراك علشان تخلي بالك من اللي بيحطوه قدامك وتزقه وتأكد اللي بيحبوك أضعاف أضعاف أضعاف الحبه دول اللي كل واحد فيهم فاتح عشرين حساب..ربنا ينزع مافي صدورهم من غل لمصلحتهم.. قولوا امين».
