أعلن  محمود الخطيب رئيس النادي الأهلي ابرام عدد من الصفقات القوية قائلا : في تدعيم قوي جدًا في بعض المراكز اللي احنا محتاجينها ، ودا ميقللش من اللاعيبة الموجودة لانها من اميز اللاعبين الموجودين ، شركة الكرة بقت موجودة في ادارة منظومة الكرة في النادي الاهلي بالتنسيق مع مجلس الادارة لان لازم المجلس يدعم كل قرار. 
وأضاف الخطيب في بيان تلفزيوني انه يشعر بحزن جمهور الأهلي وقلقهم علي الفريق .. ولكن احنا بنكون زعلانين اكتر لان احنا اللي هنسأل قدام الجميع قدمنا اللي علينا ولا لأ .. في وقت الفرحة انتم بتكونوا فرحانين بينا جداً وفي  الاخفاق يجب ان نتحمل دا لان دي من مسؤليتنا. 
واستكمل : أنا تحدثت مع اللاعبين وقلت لهم إن من حب الجمهور ليكم ومن دعمهم بيكونوا زعلانين عشان كدة بيلوموا عليكم لانهم شايفينكن أحسن من كدة بكتير ، لكن برضه لازم نقول أن نفس اللاعيبة دي من فترة صغيرة كانت في نهائي أفريقيا وتالت كأس عالم بأداء العالم كله اتكلم عليه، فيه عوامل خارجية تؤدي أنها بتحبط لاعبيتنا ومنها التحكيم من السنة اللي فاتت وألف خط يتحط تحت التحكيم ، خليك عادل و أدي لكل واحد حقه ، هناك أخطاء تحكيمية فجة وكلها ضد الأهلي وهناك مجاملات في اتجاهات أخرى ، النادي الاهلي بيطلب العدل بس “.
من حق جمهور الاهلي العظيم علينا اننا نطلع نتكلم ، احنا بنعترف ان في تقصير مننا وكمان نسارع في الاصلاح لان الناس اللي بتشتغل بجد ممكن تغلط لكن العيب اننا نستمر ومنشوفش الغلط وان شاء الله احنا عارفين ازاي نعالج الغلط ، بنتمنى انكم تدعمونا. 
وواصل: "تولينا المسؤولية وكنا نحضر لاستعادة بطولة أفريقيا بعد غياب 7 سنوات. آخر 6 سنوات الأهلي وصل إلى 5 نهائيات وهو أمر لم يحدث في أوروبا".